Logo RefBeJuSo

Ökumenisches Frouezmorge

Informativ und gesellig

50. Frouezmorge

Botzheiterefaane itz isch 50.igschte Frouezmorge vom 21. April 2022 im Wilerhorn z’Brienzwiler scho verbi! Das geit uf ke Chuehut, scho wider si über 100 Froue am Frouezmorge im Wilerhorn gsi. Gehris hei alli Regischter zoge u alli Gescht hei zersch a de schön deckte Tische äs wunderbars Zmorge gnosse. Nachhär hei di zwe Musiker Erich Murer u Alex Eggenbärg nüt la aabrönne, hei uf d’Tube drückt u hei alli mit ihrne Dialäkt Lieder verzouberet. U de het dr Mundartspezialist, Autor und Publizischt Christian Schmid, wo de meischte vom Fernseh u vom Radio (Schnabelweid) här oder vo sine Büecher, wo är über d’Bedütig u d’Härkunft vo Usdrück u Redensarte gschribe het bekannt isch, sis Referat aagfange. Botzheiterefaane, dr Herr Schmid isch Hahn im Chorb gsi u het richtig Gas gä! Är het sis riesige Wüsse über Redensarte us em Ermel gschüttlet u het z’Iis schnäll broche u alli Gescht si Für u Flamme gsi. Das frisst ke Chue awäg, dr Herr Schmid het sech wie ne Häftlimacher vorbereitet gha, het d’Sach uf ä Punkt bracht u derbi dr Fade nie verlore. O we ä volle Buch nid gärn studiert, hei d’Froue d’Ohre gspitzt u mängs Liecht isch ihne ufgange, we är d’Härkunft vo de Redensarte erklärt het. Dr Referänt isch derbi nid uf em höche Ross ghocket, u het o niemer i d’Pfanne ghoue, är het alls vo Pontius zu Pilatus erklärt u gluegt, dass ihm nüt dür d’Latte geit. Am Schluss hei d’Musiker no eis gschpilt u mit em Ohrwurm vor «Rosmarie» hei alli chly Schmätterlinge im Buch gschpürt u hei villich sogar z’Zwinkere vo Erichs Ouge gseh. Dr Bsuech vom Herr Schmid isch definitiv nid für d’Füchs gsi. Är het di erschti Gige gschpilt, öppe wieder ä Gang ueche gschaltet u dr Nagel geng uf ä Chopf troffe, drum hei mir ihm o nid i d’Schueh blase. O bi de Frage ich dr Herr Schmid nid uf z’Muul gheit u het nid nume 08/15 Antworte gäh u mi het gmerkt, dass är si Bruef vor Pike uf glehrt het. Mir vom Vorbereitigsteam hei ihm u sire Frou, wo äxtra dr wit Wäg vo Schaffhuse under d’Füess hei gno, ke Stei i Garte gschosse, nei mir hei ihne ä Chischte mit feine Sache us dr Region zum Ässe gschänkt. Z’letscht si d’Würfel gfalle u z’ganze Frouezmorge-Team het sech mit emene Jubiläums-Spitzbueb vo allne verabschiedet. Bi de 50 Frouezmorge, wo si zäme organisiert hei, hei si 4'885 Froue zu de verschiedenschte Thema chönne begrüesse u si si überzügt, dass ihri Arbeit definitiv nid für d’Chatz isch gsi.

Text: Marianne Zumbrunnen